Түркия адам укуктары боюнча европалык конвенцияны убактылуу токтотуп турат. Бул тууралуу өлкөнүн вице-премьери Нуман Куртулмуш билдирди.

Анын айтымында, президент Режеп Эрдоган киргизген өзгөчө кырдаал тартиби бир же бир жарым айдын ичинде алынышы мүмкүн.

Буга чейин өлкө башчысы өзгөчө кырдаал үч айга киргизилгенин билдирген. Бул чара президентке парламенттен айланып өтүп жаңы мыйзамдарды кабыл алууга шарт түзөт. Укук коргоочулар бул кадам төңкөрүш аракетин колдогондорду куугунтуктоого алып келет деп кооптонушууда. Германиянын тышкы иштер министри Франк Вальтер Штайнмайер бейшембиде Түркияны өзгөчө кырдаал абалын болушунча тезирээк токтотууга чакырды.

16-июлга караган түнү Түркияда аскерий төңкөрүш жасоо аракети болду. Бийлик аны басып коё алды. Козголоңго тиешеси бар деген шек менен 6 миңдей киши кармалды. Арасында жогору даражадагы офицерлер, аткаминерлер жана судьялар бар. Мектептерде жана жогорку окуу жайларында төңкөрүштүн тарапташтары менен байланышы бар делген кызматкерлер жумушунан алынууда.