23 жаштагы душанбелик кыз кыздык белгисин First Night (Биринчи түн) онлайн-аукциону аркылуу 10 миң долларга сатууну чечти. Бул платформада дүйнө жүзүндөгү жүздөгөн кыздар “алгачкы түнүн” колунда бар эркектерге сатышат.

Жакында аукциондо пайда болгон 23 жаштагы тажикстандык кыздын лотунда: ”Мен бойтойгон жакшынакай кызмын. Келечекте жакшы аял болуу үчүн бай эркек издеп жатам. Тил алчаак, жароокер жана ак көңүлмүн. Мен кыз бойдонмун”, — деп жазылган.

“Азаттыктын” тажик кызматы бул кыз менен байланышкан. Ал үй-бүлөсү карызга батканын, жакындарына жардам берүү үчүн кыздыгын сатууну чечкенин билдирди.

Кыз чыгымды кардар төлөсө, кыздыгын текшертүү үчүн медициналык кароодон өтүүгө даяр экенин кошумчалады.

Аукциондо кыздыктын баасы жашка жана өң-түскө жараша 3 миңден 1 млн долларга чейин бааланат.

Тажикстанда кыздар күйөөгө чыгар алдында аруулугун текшертүү үчүн медициналык кароодон өтүшөт. Укук коргоочулар муну адам укугун бузуу катары аташып, тажик өкмөтүн аталган талапты жокко чыгарууга чакырышкан.