КР Социалдык фондунун электрондук отчеттуулук системасы август айынан тартып, республика боюнча бардык ишканаларда иштей баштайт. Бул тууралуу Жалал-Абад шаардык мэриясында өткөрүлгөн семинарда маалым болду.

Ага Жалал-Абад шаардык мэриясына караштуу бардык мекеме- ишканалардын эсепчилери келип катышты.  КР Социалдык фондунун Жалал-Абад облусу боюнча АЙПИ координатору Улан Исмаиловдун айтымында, республика боюнча бардык ишканаларды электрондук отчеттуулукка өткөрүү боюнча өкмөттүн иш планы март, апрель айларында иштелип чыккан.

“Азыр биз ошол функцияны ар бир район-шаарларга түшүндүрүп келе жатабыз. Буга чейин Майлуу-Суу, Кара-Көл шаарларында, Токтогул районунда семинар өткөрүлдү. Электрондук отчеттуулук системасына өткөрүүнүн негизги максаты, биринчиден коррупцияны алдын алуу болсо, экинчиден убакытты үнөмдөө болуп саналат. Анткени эсепчилери кезек күтпөстөн эле каалаган маалында, бош убактыларында электрондук вариантта отчетту жөнөтүп коюшат. 1-августтан тартып республика боюнча ар бир ишкана отчетун ушул функция аркылуу беришет”,-дейт У.Исмаилов.