Жалал-Абад облусу боюнча жалпы 600 гектар жерде жапайы кара куурай өсөт, анын ичинен Базар-Коргон районундагы Сейдикум айылында 4 гектарга чукул жапайы кара куурай өскөн жерлер. Бул тууралуу ОИИБнын басма сөз кызматы билдирди.

Алынган маалыматка караганда, аларды жок кылуу үчүн атайын Базар-Коргон РИИБнүн өздүк курамынан, Мыктыбек Сулайманов атындагы Сейдикум аймактык милиция бөлүмчөсүнүн кызматкерлеринен жана элдик кошундун мүчөлөрүнөн жумушчу бригада түзүлүп жергиликтүү Сейдикум айыл өкмөтүнүн колдоосу менен керектүү техникалар менен камсыздалып  оруп, жыйноо жана күйгүзүп жок кылуу иштери жүргүзүлдү.

“Ошону менен бирге милициянын аймактык ыйгарым өкүлдөрү (учасковый) ар бир үйдүн айланасын көзөмөлдөп үй ээлерине эскертүүлөр берилип, жок кылуу иштерин жүргүзүүдө. Жасалып жаткан тазалоо жумуштары  баңгичилике каршы күрөшүү жана алдын алуу иш чараларынын бири”-деп билдирет Базар-Коргон РИИБнүн орун басары, милициянын подполковниги Улукбек Сейиткулов.