Жалал-Абад шаарындагы “Акбермет” балдар үйүнө “Билайн” компаниясы тарабынан материалдык жардамдар көрсөтүлдү. Бул тууралуу аталган балдар үйүнүн жетекчиси Алима Ташбаева билдирди.

Анын айтымына караганда, балдар үйүндө бүгүнкү күндө турмушта түрдүү себептер менен кароосуз калган сегиз бала тарбияланып келүүдө. Бул жерде балдар он сегиз жашка чейин тарбияланат.

“Билайн компаниясы биздин балдар үйүнө  2009-жылдан бери балдарга керектүү болгон түрдүү материалдык жардамдарды берип келишет. Көрсөтүлгөн жардамдар үчүн компанияга рахматыбызды айтып, мындан ары да иштерине ийгиликтерди каалайбыз, -дейт А.Ташбаева.

“Билайн” компаниясынын түштүк региону боюнча маркетинг жана реклама боюнча башкы адиси Гулчехра Ишанованын айтымында, компания бүгүнкү күнгө чейин өлкөдөгү балдар үйүнө болгон жардамдарын  көрсөтүп келет. 

“Бүгүн Жалал-Абад шаарындагы “Акбермет” балдар үйүнө материалдык жардамыбызды көрсөтүп жатабыз.  Негизинен алгач балдар үйүнө жардам көрсөтүү алдында алардын кандай кемчиликтери бар экенин сурап, ошол керектелүүчү буюмдарды алып берүүгө аракеттенебиз. Биз “Акбермет” балдар үйүнө 20 миң сомдук материалдык жардам көрсөтүп жатабыз”,- дейт Г.Ишанова.