Бир сутка ичинде Кыргызстандын ооруканаларында коронавирустан алты, пневмониядан 40 бейтап каза болду. Бул тууралуу 10-июлда Саламаттык сактоо министрлигинин өкүлү Айнура Акматова билдирди.

Коронавирустан көз жумгандар: Бишкектеги Кыргыз-түрк ооруканасында 90 жаштагы эркек, Жайыл аймактык ооруканасында 70 жана 69 жаштагы эки аял, Жалал-Абад облустук ооруканасында 49 жана 53 жаштагы эки эркек жана Нарын облустук ооруканасында 61 жаштагы бир аял бейтап.

Пневмония болгон 40 адамдын 26сы Бишкекте, калгандары аймактарда.

Бир сутка ичинде коронавирус деген диагноз дагы 511 адамга коюлду, дарыланып жаткан 81 бейтап айыгып, үйүнө чыгарылды.

Коронавирус жалпысынан 9358 адамдан табылды, алардын ичинен 122 бейтап кайтыш болду, 3134 бейтап айыгып кетти.

Пневмония менен март айынан бери 3829 адам ооруканага жаткырылганы 9-июлда айтылган. 10-июлда бул тууралуу жаңы маалымат берилген жок. Бул илдеттен каза болгондордун саны коронавирус эпидемиясы башталгандан бери 350 адамга жетти.

Кыргызстандын башкы өпкө дарыгери Талантбек Сооронбаев азыр өлкөдө сасык тумоо эмес, COVID-19 пандемиясы гана өкүм сүрүп жатканын айткан.

"Азаттык" үналгысы.