Президент Алмазбек Атамбаев «Кыргыз Республикасынын Өкмөтү жөнүндө» мыйзамына кол койду. Бул конституциялык мыйзам өкмөт мүчөлөрүн кызматтан бошотуу боюнча талаштуу укуктук нормаларды жок кылуу үчүн иштелип чыккан. Бул тууралуу өкмөттүн басма сөз кызматы билдирди.

Учурда иштеп жаткан мыйзамдын 24-беренесинде өкмөт мүчөлөрүн ким, кандай эреже менен кызматтан бошотору жазылган эмес. Бул кемчиликти жоюу үчүн бир тартип киргизилет. Тагыраак айтканда, эми премьер-министрдин негиздүү сунушу менен президент өкмөт мүчөсүн кызматынан кетирет.

Ошондой эле, жаңы мыйзам боюнча өкмөт коллегиясында бир чечим кабыл алгандан кийин министрлерге эл алдында ага каршы чыгып же аткарбай коюусуна тыюу салынды.