Эгер Кытай Гонконгго басым жасоону уланта берсе, Улуу Британия мегаполистеги үч миллиондой жашоочуну кабыл алууга даяр. Бул тууралуу Times гезитине британ премьер-министри Борис Жонсон билдирди. Аларга королдуктун жарандыгын алуу мүмкүнчүлүгү берилет.

Жонсон королдуктун атайын паспортун алууга укугу бар бардык жашоочуларга жарандык үчүн жол ачууну убадалады. Бул документке 350 гонконгдук жаран ээ, аны дагы 2,6 миллион киши британ колониясынын мурдагы жашоочулары катары ала алат. Азыр мындай паспорт Британияда иштөөгө же жарандык алууга укук бербейт. Бирок премьер-министр королдук виза системасын өзгөртүүгө даяр экенин айтты.

1842-жылы Британия ээлеп алган Гонконг 1997-жылы өзгөчө укуктары бар, демократияга жана эркиндикке кепилдик берилген атайын аймак катары Кытайга кайтарылган. Бириккен Улуттар Уюму менен макулдашууга ылайык, Бээжин Гонконгдун ички саясатына, анын ичинде сот чечимдерине да кийлигишүүгө укугу жок.

Былтыр жаздан бери кылмышка шектүүлөрдү Кытайга өткөрүп берүүгө жол ачкан мыйзам долбооруна нааразы болгон миңдеген адамдар демонстрацияга чыгышкан. Элдин каршылыгынан улам документ артка чакыртылганы менен бийликке каршы нааразылык толкуну токтогон эмес. Жергиликтүү калк автономиянын башчысы Кэрри Лэмдин кызматтан кетишин жана акциялар маалында камалгандардын чыгарылышын талап кылууну коронавирус пандемиясы башталгыча улантышкан.

Нааразылык май айында пандемияга карабай кайра жанданган.