Сириядагы согушка катышкан Казакстандын жараны Магомед Арчаков Австрияда 12 жылдык жаза мөөнөтүн өтөп жатат. Ал былтыр жайында терроризмге байланышкан кылмыштарга айыпталып соттолгон.

Соттун материалдарына ылайык, Арчаков Сирияга 2013-жылы Москва, Стамбул шаарлары аркылуу барган. 2015-жылдын ноябрына чейин «Ислам мамлекети» (ИМ) террордук тобунун катарында Сириянын президенти Башар Асаддын аскерлерине каршы согушка катышкан. 2015-жылы өлкөнүн түндүк бөлүгүндөгү чабуулдардын биринде жаракат алып, Украина аркылуу Австрияга качып барган.

Арчаков австрия бийлигине туулгандыгы тууралуу жасалма күбөлүк көрсөтүп, Орусиядан келгенин, ал жакта диний көз карашы үчүн куугунтукка кабылганын айтып, башкалка берүүнү өтүнгөн. Жергиликтүү басылмалардын маалыматына караганда, Австрияда Арчаков эч жерде иштеген эмес, үй-бүлөсү менен ай сайын социалдык жөлөк пул алып жүргөн.

Казакстандын Терроризмге каршы күрөшүү борборунун маалыматына ылайык, Жакынкы Чыгыштагы согуш жүрүп жаткан аймактарда 100дөн ашык казакстандык бар.

Өлкөнүн Тышкы иштер министрлиги Арчаков кармалганда аны өткөрүп берүү өтүнүчү менен Австрия бийлигине кайрылганын, бирок терс жооп болгонун билдирди.