Кечээ, 18-июлда Саламаттык сактоо министрлигинде министр Т.А.Батыралиев Европарламенттин өкүлдөрү менен жолугушту. Бул тууралуу министрликтин басма сөз кызматы билдирди.

Алынган маалыматка караганда, адаттагы жолугушуулардан айырмаланып бул жолугушуу    кыргыз тилинде-эне тилибизде жүргүзүлдү.  Бул албетте саламаттык сактоо министри Т.А.Батыралиевдин мекенге болгон чыныгы патриоттук сезими жана өз эне тилине болгон сүйүүсү деп айтсак жаңылышпайбыз.   

Делегациянын курамында: Норберт Нойзер мырза – Европарламенттин депутаты, репродуктивдүү ден-соолук маселеси боюнча жумушчу топтун мүчөсү,  Сенатор Флориан Дорель Бодог – Румыния Сенатынын мүчөсү, саламаттык сактоо комитетинин мүчөсү, Амая Арреги айым -  Басков парламентинин мүчөсү, Ивон Фери айым – Швейцария Улуттук кеңешинин мүчөсү, Тулай Кайнарка айым – Түркия Улуу Улуттук кеңешинин мүчөсү жана башкалар болду.

Делегациянын максаты - Кыргызстандагы репродуктивдүү ден соолук, анын ичинде  аялдардын, балдардын, өспүрүмдөрдүн ден соолугу боюнча маалымат алуу.

- Депутаттар, Өкмөт өкүлдөрү жана тиешелүү тараптар, ошондой эле жергиликтүү саламаттык сактоо өкүлдөрү менен жолугушуп, аталган тармактагы көйгөйлөр, социалдык факторлор, гендердик маселелер жөнүндө маалымат алгыбыз келет, - деди делегация өкүлдөрү.

 Ошону менен бирге, кыргыз бермети Ысык –Көлгө баруу ниетин да жашырышкан жок.

Өз кезегинде министр Т.А.Батыралиев   Кыргызстан бул чөлкөмдөгү демократиялык жоду тандаган  жана саясий жактан туруктуу өлкө экендигин  белгилөө менен Европарламенттин репродуктивдүү ден-соолук маселесинде  Кыргызстанга көңүл буруусу өзгөчө мааниге ээ экендигин айтты.

- Аялдар, өспүрүмдөр, ымыркайлар өлүмү бир эле социалдык абалга байланыштуу эмес,  өлкөдө аялдардын социалдык абалы начар деп айтууга болбойт,  дээрлик баары билимдүү.   Бул көйгөй эң ириде экономикадан көз каранды. Дени сак бала дени сак энеден төрөлөт. Энелерге медициналык жардам көрсөтүү системасы да бүгүнкү күндүн талабына жооп бербейт. Тиешелүү адистик боюнча жогорку медициналык билим алуу мөөнөтү да  замандын талабына жооп бербейт. Ошондуктан, ылайык  даярдамайын өнүгүү болбойт, - деди министр.    

Ошондой эле, Европарламенттин бул багыттагы сунуштарын колдоодо  жергиликтүү өзгөчөлүктөрдү сөзсүз эске алына тургандыгы, ошол эле учурда медицина дүйнөнүн бардык жеринде бирдей экендигин кошумчалады.