Иерусалим, апрель, 2020-жыл.

Израиль премьер-миинстри Биньямин Нетаньяху жана анын шайлоодогу мурдагы атаандашы Бенни Ганц өкмөттү бирге куроого келишти.

Бул чечим Израилди бир жылга созулган саясий туңгуюктан чыгарат дегенди билдирет. Муну менен катар Биньямин Нетаньяху коррупцияга байланыштуу айыптоолордон да кутулат.

"Нью-Йорк таймс" гезити маалымдагандай, жаңы өкмөт куралса, Израиль төртүнчү жолу шайлоо өткөрбөйт. Буга чейин үч жолу шайлоо болуп, эч ким жеңишке жеткен эмес. Экиге бөлүнгөн эл биргелешип өкмөт кураган соң коронавирус пандемиясына каршы чогуу күрөшүүгө мүмкүнчүлүк түзүлөт.

19-апрелде Биньямин Нетаньяху өлкө акырындап карантинден чыга баштарын билдирген. Ага ылайык, ишкана-мекемелерде буга чейин жамааттын 15 пайызы гана жумушка келиши керек болсо, эми 30 пайызга чейин көбөйөт.

Ошондой эле электроника, китеп, кагаз-калем жана чарба буюмдарын саткан дүкөндөр ачылат. Андан сырткары коомдук транспорттор каттай баштайт, көчөлөрдө, коомдук жайларда спорт менен алектенүүгө уруксат берилет.