АКШ президенти Дональд Трамп

АКШ президенти Дональд Трамп өлкө Дүйнөлүк Саламаттык сактоо уюмун (ДССУ) каржылоону токтото турганын маалымдады.

Трамп Ак үйдө брифинг өткөрүп жатып, январдын аягында Бүткүл дүйнөлүк саламаттык сактоо уюму коронавирус инфекциясына байланыштуу Кытайга учууларды чектөө жөнүндөгү АКШнын чечимине каршы чыкканын эске салды. Трамп мунун менен уюм пандемиянын өөрчүшүн токтотуу мүмкүнчүлүгүн колдон чыгарып жиберди деп эсептейт.

"Башка өлкөлөр жана аймактар ДССУнун сунушу боюнча Кытай менен чек араларын ачык бойдон калтырып, коронавирустун бүткүл дүйнөгө тарашын тездетишти", – деди Трамп.

Анын айтымында, Кытайга ашыкча ишенүү менен коронавирусту жуктурган кишилердин саны 20 эсеге көп болуп жатат. АКШ президенти ДССУ негизги милдетин аткара албай калганын жана бул үчүн жоопкерчилик тартышы керек экенин билдирди.

Трамп уюмду каржылоону токтотуу планын 6-апрелде эле жарыялаган. Ал ДССУ негизинен Кошмо Штаттардан акча аларын, ошол эле маалда уюм Кытайга өзгөчө көңүл бөлүп туруп алганын жазган. Анын билдиришинче, АКШ жыл сайын ДССУга 400-500 миллион доллар берет, бул Кытайдын төлөмдөрүнөн 10 эсеге көп.

Бул арада Бириккен Улуттар Уюмунун башкы катчысы Антониу Гутерриш азыр ДССУнун каражаттарын кыскарта турган маал эмес экенин белгиледи.

Дүйнөдө коронавирус жуктурган кишилердин саны эки миллиондон ашты, 126 миңден көп киши өлдү. Ооруну жуктургандар жана өлгөндөрдүн саны боюнча АКШ биринчи орунда турат. Кошмо Штаттарда 614 миңден ашуун адам вирус жуктуруп алды, 26 миңден көп киши көз жумду.