Кытайдын эң бай адамы, «Алибаба» компаниясынын негиздөөчүсү Жек Ма.

«Алибаба» электрондук соода аянтчасынын түптөөчүсү, кытайлык миллиардер Жек Манын кайрымдуулук фондунун Кыргызстанга берген гуманитардык жардамы Ош, Жалал-Абад шаарлары менен Сузак, Ала-Бука жана Ноокат райондоруна жиберилди.

««Алибаба» корпорациясынан келген медициналык каражаттардын калганы - беткаптар, коргоо кийимдери, термометрлер гуманитардык жардамдарды бөлүштүрүү боюнча министрликте түзүлгөн комиссия аркылуу бөлүштүрөт. Алар кайсы жерде керек болсо ошол жерге берилет», - деди саламаттык сактоо министринин орун басары Мадамин Каратаев.

20 млн. сомго бааланган медициналык каражаттар, анын ичинде бир жолу колдонуучу беткаптар, коргоочу кийим жана термометрлер Кыргызстанга 10-апрелде келген. Кыргызстандын тышкы иштер министрлиги жүктү жеткирүүгө кеткен чыгымды да «Алибаба» компаниясы өзү көтөргөнүн билдирди.

Жек Манын кайрымдуулук фонду мындай жардамды Борбор Азиядагы беш мамлекетке берди.

"Азаттык" үналгысы