Казакстандын биринчи президенти, Мамлекеттик кеңештин башчысы Нурсултан Назарбаев 8-апрелде өлкө жарандарына кайрылуу жасап, элди дүрбөлөңгө түшпөөгө чакырды. Ошол эле маалда ал популисттик жана кишилерди кайраштырган сөздөрдөн оолак болууга үндөдү.

Нурсултан Назарбаев жаңы коронавирус пандемиясы мамлекеттер аралык мамиленин форматын өзгөртөт деп эсептейт. Ал кечээ эле өз ара душман болгон, санкцияларды киргизген өлкөлөр бүгүн бири-бирине кол сунуп жардам берип жатканын мисал келтирди.

Казакстандын биринчи президенти пандемиядан улам оор абал жаралганын, бирок өлкө бул кырдаалдан элдин чыдамкайлыгы, туруктуулугу, эрктүүлүгү менен чыгып кетерин билдирди. Назарбаевдин айтымында, бул үчүн каржы, материалдык ресурстар, техника, азык-түлүк запасы жетиштүү.

"Кыйын күндөрү кол куушуруп дүйнө кыдырбай, өлкөнүн келечеги жана жаңы муун үчүн көп жыл мурун Улуттук фондду жана өлкөнүн алтын валюталык резервин түзгөнбүз. Учурда 90 миллиард АКШ доллары топтолгон. Эгер бул каражатты жөндүү жана сарамжалдуу колдонсок, бул башыбызга түшкөн бурулуш күндөрдөн, олку-солку абалдан татыктуу чыгып кетүүгө жол ачат”,– деди Назарбаев.

Казакстанда 8-апрель күнү түшкө чейин вирус жуктурган кишилердин саны 709га жетти, 51 адам айыкты, алтоо көз жумду.