Грузин-түрк чек арасында өтө албай турган өзбекстандык айдоочулар

Грузин-түрк чек арасындагы «Сарпи» өткөрмө бекетинде Өзбекстандан бараткан 150дөн ашык жүк унаасы өтө албай турат.

Айдоочулардын айтымында, аларды Түркиянын аймагына карантинге байланыштуу киргизбей жатышат.

– Бүгүн бул жакта турганыбызга сегиз күн болду. Чек арадан Өзбекстандын номуру тагылган унаалар гана өткөрүлбөй жатат. Орусия, Грузия жана Азербайжандын айдоочулары тоскоолдуксуз кирип жатышат. Бизге күн сайын унаа токтотуу жайы үчүн акча төлөөгө туура келүүдө. Акчабыз аз калды», — деди айдоочулардын бири.

30-мартта ара жолдо калган айдоочулар Өзбекстандын президенти Шавкат Мирзиёевге видеокайрылуу жасашкан. Азырынча бийлик өкүлдөрү бул кайрылууга жооп бере элек.

Өзбекстандын Грузиядагы элчилиги өзбек пахтасы жүктөлгөн автоунааларды киргизүү тууралуу түрк бажысы менен сүйлөшүүлөр жүрүп жатканын билдирди.

COVID-19 инфекциясы дүйнөгө тездик менен жайылып жатканына байланыштуу Түркия марттын ортосунда 66 мамлекеттин жарандарынын өлкөгө кирүүсүн чектеген.