Жекшемби күнү Орусиянын бир нече шаарында Конституцияга сунушталган өзгөртүүлөргө, анын ичинде Владимир Путиндин президенттик мөөнөттөрүнүн жокко чыгарылышына каршы акциялар өттү.

«Сибирь.Реалии» басылмасынын маалыматына караганда, Красноярск шаарындагы митингге 200гө жакын адам катышты.

«Настоящее Время» телеканалынын кабарчысы Екатеринбургдагы нааразылык акциясына 50гө жакын адам келгенин билдирди. Коронавируска байланыштуу бул шаарда 50дөн ашык адамдын катышуусунда иш-чараларды өткөрүүгө тыюу салынган.

Чита шаарында да чектөөлөрдөн улам катышуучулардын саны 50дөн ашкан жок. Алар колдоруна «Түбөлүктүү Путинге жол жок» деген жазууларды кармап чыгышты.

Новосибирсктеги митингге 40ка жакын адам катышып, «саясий туткундардын жаза мөөнөтүн жокко чыгарууну» жана Конституцияга өзгөртүүлөрдү киргизүүдөн баш тартууну талап кылышты.

«Росбалт» агенттигинин маалыматына караганда, ушундай эле акциялар өлкөнүн башка бир нече шаарларында да өттү. COVID-19 вирусунан улам Москва жана Санкт-Петербург сыяктуу ири шаарларда эл көп катышкан иш-чараларга тыюу салынган.

Президент Путин өткөн аптадагы буйругу менен Конституциялык түзөтүүлөр боюнча бүткүл орусиялык добуш берүүнү 22-апрелге белгилеген. Анда шайлоочуларга «Орусия Федерациясынын Конституциясына киргизилип жаткан өзгөртүүлөргө макулсузбу?» деген бир гана суроо берилет.

Баш мыйзамга сунушталган өзгөртүүлөрдүн арасында Владимир Путиндин президенттик мөөнөттөрүн жокко чыгаруу сунушу да бар. Ал Путинге 2024-жылдагы президенттик шайлоого кайра талапкерлигин коюуга жана өлкөнү кеминде дагы 2036-жылга чейин башкарууга мүмкүндүк берет.

Буга чейин Орусиянын Борбордук шайлоо комиссиясынын (БШК) башчысы Элла Памфилова коронавирустан улам конституциялык өзгөртүүлөр боюнча добуш берүү кийинкиге жылдырылышы мүмкүндүгүн билдирген.