Бүгүн, 23-январь күнү Өкмөттүн Жалал-Абад облусундагы ыйгарым укуктуу өкүлү болуп Нурболот Мирзахмедов дайындалып, аны облус коомчулугуна биринчи вице-премьер-министр Кубатбек Боронов тааныштырды.

Өкмөттүн Жалал-Абад облусундагы мурдагы ыйгарым укуктуу өкүлү Кыянбек Сатыбалдиев өз арызынын негизинде ээлеген кызматынан кетти. Анын ордуна мурда КР Өзгөчө кырдаал министри болуп иштеп турган Нурболот Мирзахмедов дайындалып, кечээ 22-январда Өкмөт башчынын буйругу чыккан.

Актив алдында жаңы дайындалган Өкмөттүн Жалал-Абад облусундагы ыйгарым укуктуу өкүлү Нурболот Мирзахмедов сөз сүйлөп, мурдагы өкүл Кыянбек Сатыбалдиевге ыраазычылык билдирип кетти. Ошондой эле, ал сөзүндө бул облус ага жат эмес экендигин, өзү Сузак районунун акими болуп иштеп турганда, бир топ ийгиликтердин жаралышына түрткү болгондугуна токтолду. Мындан ары актив менен биргеликте облустун өсүп-өнүгүшүнө салым кошууга бардык күч-аракетин жумшай тургандыгын баса белгилеп кетти.

Акырында, биринчи вице-премьер-министр К.Боронов облустун активинде сөз сүйлөп, өткөн жылдагы социалдык-экономикалык жетишкендиктерге кыскача токтолуп кетти.