Үстүбүздөгү жылдын 6 ай ичинде Жалал-Абад шаардык өрткө каршы мамлекеттик кызмат бөлүмүнүн кызматкерлеринин өрттү өчүрүүдөгү ыкчам аракеттеринин натыйжасында 7 миллион 680 миң сомдук материалдык баалуулуктар сакталып калды. Бул тууралуу маалыматты аталган бөлүмдүн башчысынын милдетин аткаруучусу Кубанычбек Токтосунов билдирди.

Анын айтымында, Жалал-Абад шаардык өрткө каршы мамлекеттик кызмат бөлүмүнүн кызматкерлери тарабынан шаарыбыздын аймагында жайгашкан мамлекеттик жана чарбалык объектилерде, ошондой эле жеке менчик мекеме, ишканаларда атуулдардын турак жайларында өрт кырсыктарын алдын алуу жана өрт коопсуздугун камсыз кылуу максатында быйылкы жылдын алты айынын ичинде өрткө каршы профилактикалык иш-чаралар жүргүзүлдү. Чарбалык объектилерде, турак жайларда өрт кырсыктарын алдын алуу багытында чарбалык объектилердин кызматкерлери менен 14 миң 560 атуулдун катышуусунда 47 лекция жана  14 миңден ашуун жарандардын катышуусунда 154 өрттүн алдын алуу боюнча инструктаждар өткөрүлдү.

"Өрткө каршы тынымсыз жүргүзүлгөн иш-чараларга карабастан, 6 ай ичинде 25 өрт кырсыгы катталып, өрттөн келтирилген материалдык зыян 5 миилион 668 миң сомду түздү. Ал эми күжүрмөн даярдыктагы кызматкерлердин өрттү өчүрүүдөгү ыкчам аракеттеринин негизинде 7 миллион 680 миң сомдук материалдык баалуулуктар сакталып калды дейт”,- К.Токтосунов.