9-январда Актөбө облусунун Ногайты айылына жакын жерге орусиялык ракетанын сыныктары түшкөн. Бул тууралуу Казакстандын Коргоо министрлиги кабарлады.

Мекеменин 11-январдагы билдирүүсүндө ракета Орусия ижарага алып колдонгон Казакстандын аскердик полигонундагы машыгуу маалында атылган.

— Ракетанын сыныктары түшкөн аймакта курмандыктар жана жабыркагандар жок. Калк үчүн эч кандай коркунуч жаралган эмес. Учурда ал жер полициянын курчоосуна алынып, тиешелүү кызматтын өкүлдөрү иштеп жатышат. Окуянын себептерин аныктоо менен Актөбө облустук акимчилигинин алдында түзүлгөн комиссия алектенет, — деп жазылган билдирүүдө.

10-январда жергиликтүү бийлик өкүлдөрү менен Өзгөчө кырдаалдар департаментинин аймактык башкармалыгы Ногайты айылына жакын жерге белгисиз металлдын бөлүктөрү түшкөнүн ырастаган. Ага чейин жергиликтүү тургундар жерде жаткан сыныктардын күйүп жатканы тартылган видеолорду Интернетке жайгаштырышкан.

Орусия Казакстандагы үч аскердик полигонду ижарага алып, зениттик-ракеталык комплекстери менен абадан коргонуу каражаттарын сыноо үчүн жана Орусиянын аймагынан учурулган ракеталар үчүн бута катары колдонуп келет.

2016-жылы Казакстандын Коргоо министрлиги ижарага алынган ар бир гектар жер үчүн Орусия 2 доллар 33 центтен акча төлөй турганын билдирген. 2017-жылы Москва Актөбө облусунун Мугалжар районундагы Эмба полигонун колдонууну токтотконун жарыялаган.

Буга чейин казакстандык активисттер бир нече жолу Орусияга полигондорду ижарага берүүнү жана Байкоңур космодромунан аба кемелерин учурууну токтотууну талап кылышкан.