Ооганстанда жекшемби күнү өткөн президенттин шайлоонун болжолдуу жыйынтыктары жарыялангандан кийин апелляциялык комиссияга шайлоо блокторунан даттануулар келип түшүүдө.

Апелляциялык комиссиянын мүчөсү Кутбиддин Руйдор эки сутканын ичинде президенттик шайлоонун жыйынтыктары боюнча алты миңден ашык даттануу келгенин билдирди. Анын айтымында, арыздарды кабыл алуунун акыркы күнү — шаршембиге чейин даттануулар 10 миңге жетиши мүмкүн.

Өлкөнүн Апелляциялык шайлоо комиссиясынын төрага орун басары Динмухаммад Азими даттануулардын санын эске алуу менен президенттик шайлоодо добуштардын көбүнө ээ болгон эки талапкердин катышуусунда экинчи тур өтүшү мүмкүн экенин белгиледи.

Ал ортодо Президенттикке талапкерлердин кеңеши добуш берүүнүн болжолдуу жыйынтыктарын тааныбай тургандыктарын жана саясий каатчылыкты чечүү максатында жаңы өкмөт түзүүнү сунуштады.

Апелляциялык комиссия 39 күндүн ичинде бардык даттанууларды карап чыгып, жыйынтыктарын Көз карандысыз шайлоо комиссиясына жөнөтүшү керек.

Көз карандысыз шайлоо комиссиясы 22-декабрда президенттик шайлоонун болжолдуу жыйынтыктарын жарыялаган. Ага ылайык, өлкөнүн учурдагы президенти Ашраф Гани 56% добушка ээ болуп, башка атаандаштарынан озуп чыккан. Ал эми анын негизги атаандашы Абдулла Абдулла добуштардын 39,5% алган.