25-декабрда Алматы облусунун Талгар райондук сотунда жарандык активист Галина Арзамасовага кол салуу фактысын териштирүү иши башталды.

63 жаштагы Арзамасованы август айынын аягында Талгар райондук акимчилигинин имаратынын жанынан атып кетишкен. Натыйжада ал жаракат алган.

Бул иш боюнча Панфилов айыл аймагынын мурдагы акими Нургали Аппазов менен анын айдоочусу Гани Смановго «Бейбаштык», «Ден соолукка атайылап зыян келтирүү» беренелери боюнча айып тагылган.

Соттук угуу учурунда эки тараптын тең адвокаттары айыптоочу акт менен макул болбой, ишти кайра кароо үчүн прокуратурага жөнөтүүнү сурашты.

Жабырлануучу тараптын жактоочусу бейбаштыкты киши өлтүрүүгө аракет жасоо жөнүндө беренеге алмаштыруу керек деп эсептейт.

Судья тараптардын өтүнүчүн канааттандырган жок. Арзамасова жана анын адвокаты сот курамына ишенбөөчүлүк билдирип, ишти башка сотко өткөрүп берүүнү талап кылды. Сот бул өтүнүчтү да четке какты. Кийинки соттук жараян 14-январга белгиленди.

Аймактагы жайыттар менен сугат суунун жетишсиздиги, жолдордун начардыгы тууралуу маселелерди көтөрүп, «жашыл аймактагы» жерлердин сатылышына каршылык билдирип келген Арзамасова буга чейин да бир нече жолу кол салууга кабылган.