Өзбекстанда «Ахмадбайдын ишинин» алкагында 1710 адам жабырлануучу деп табылып, алар жалпысынан 386 миллиард сум (40,5 миллион доллар) алдатышкан. Бул тууралуу Мажбурлап аткартуу бюросунун Ташкент облусу боюнча башкармалыгынын өкүлү Бекзод Менглиев билдирди.

Анын айтымында, эл арасында «Ахмадбай» деген ысым менен таанымал Ахмад Турсунбоевге таандык 29 кыймылсыз мүлк жана сегиз автоунаа мамлекетке өткөн. Учурда аларды аукцион аркылуу сатууга даярдыктар көрүлүүдө. Азырынча мүлктөрдү сатуудан түшкөн каражат жабырлануучуларга берилер-берилбеси белгисиз.

Мындан тышкары бул кылмыш ишинин алкагында Турсунбоевдин ири өлчөмдөгү каражаты да алынганы кабарланган. Учурда акчаны жабырлануучуларга бөлүп бере турган атайын электрондук программа түзүлүүдө.

Өзбекстанда эң ири каржы пирамидасын түзгөн ташкенттик ишкер Ахмад Турсунбаев 2016-жылы камакка алынган. Ага «акча талап кылуу, алдамчылык, алдоо жана ишенимге кирүү аркылуу бирөөнүн мүлкүн ээлеп алуу, мыйзамсыз валюта топтоо, чет өлкөлүк акчаны катуу» өңдүү айыптар тагылып, былтыр жыл башында 13 жылга эркинен ажыратылган, бирок көп өтпөй мунапыс менен жазасынын төрттөн бири кыскарган.