Ташкентте метро курулуп жаткан жерде ураган топурактын астында калып мерт болгондордун саны алты адамга жетти. Бул тууралуу өлкөнүн Өзгөчө кырдаалдар министрлигинин (ӨКМ) басма сөз кызматы билдирди.

Мекеменин маалыматына караганда, кырсыктан каза болгондор Кашкадарыя жана Самарканд облустарынын 20 жаштан 38 жашка чейинки курактагы тургундары.

Юстиция министрлигинин билдиришинче, каза тапкан жумушчулардын үй-бүлөлөрүнө 100 миллион сумдан (10,5 миң доллар) жардам берилет.

Ташкент метрополитени жүргүзүп жаткан жер астындагы курулушта болгон кырсыктын себептерин тактоо жана кесепеттерин жоюу үчүн өкмөттүк комиссия түзүлдү.