Тажикстанда Куляб мамлекеттик университетинин студенти Жонибек Хужамуродов Ички иштер министрлигинин (ИИМ) аймактык бөлүмүндө сурак берип чыккандан кийин асынып өлдү. Окуя 19-декабрга караган түнү болгон.

Маркумдун туугандарынын айтымында, тергөөчүлөр 25 жаштагы Жонибек Хужамуродовду зордуктоого айыптап, күнөөнү мойнуна алууга мажбурлап, коркутушкан. Ал айыптоолорду четке каккан.

Жонибектин агасы Талбак Майхонов милиционерлер аны “үч жыл түрмөгө отургузабыз” деп коркутканын, иниси эч кимди зордуктабаганын билдирди.

Жонибек Хужамуродовдун өлүмү боюнча териштирүү иштери башталды

Укук коргоочулар акыркы жылдары тергөө учурунда жарандарды кысымга алуу, кордоо, кыйноо учурлары көп болуп жатканы тууралуу арыз-даттануулар көбөйүп жатканына тынчсызданышууда.

Быйыл жазында Тажикстан ИИМи милицияны реформалоонун алкагында бардык сурак бөлмөлөрүндө видеокөзөмөл камералары орнотуларын билдирген.