16-декабрда Караганды облустук соту Казакстандын мурдагы премьер-министри Серик Ахмедовдун доо арызын карады. Ал облустук соттон өзүн шарттуу түрдө мөөнөтүнөн мурун бошотууну сураган. Бирок судья биринчи инстанциянын чечимин өзгөртүүсүз калтырып, Ахмедовдун өтүнүчүн артка кайтарды.

Ахмедовдун адвокаты Николай Лесниктин айтымында, мурдагы өкмөт башчы жазасынын жарымынан көбүн өтөп бүттү. Анын ичинде 1 жыл 9 ай түрмөдө отурду. Ахмедовдун жазасы 2021-жылдын 17-октябрында аяктайт.

– Ал беш жылдан ашык убакыттан бери жазасын өтөөдө. Келтирилген чыгымды толугу менен кайтарды, жумуш иштейт. Райондук сотто жакшы чечим чыккан жок. Ал мыйзамсыз жана негизсиз. Шарттуу түрдө мөөнөтүнөн мурда бошотууну сурайбыз, –деди Николай Лесник.

Ахметов коррупция боюнча айыпталып, 2015-жылдын декабрында 10 жылга абакка кесилген. Ал башында өзүнө коюлган айыпты четке каккан эле.

Бирок 2016-жылы күнөөсүн моюнуна алып, кечирим берүүнү сурагандан кийин жаза мөөнөтү эки жылга кыскартылган.

Ошол кездеги президент Нурсултан Назарбаев жарыялаган мунапыска ылайык, Ахметовдун жаза мөөнөтү 2018-жылы январда да бир жыл жети айга кыскартылган. Ал эми 6-сентябрда Казакстандын Караганды облусундагы сот мурдагы премьердин абак мөөнөтүнүн калганы шарттуу кесүү - “эркиндигин чектөө” менен алмаштырылат деген чечим чыгарган.

Серик Ахметов 2012-2014-жылдары Казакстандын өкмөт башчысы болгон.