Тажикстандын Хатлон облустук прокуратурасы 8 жаштагы өгөй кызына асылууга айыпталган кишиге карата кылмыш ишин козгоду.

36 жаштагы шектүү эки аптадан бери тергөө абагында. Анын апасы баардык айыптоолорду четке кагууда. – Ал балдарды абдан жакшы көрөт. Атүгүл кичинекей уулун да тиштегилеп жиберет. Кызды да ошентип койгон экен, анын денесинде бир нече так калыптыр. Дал ушул зордуктоого аракет жасаган деп шектенүүгө себеп болууда, – деди ал.

Соттук-медициналык экспертиза жүргүзүлүп, кыздын зорукталбаганы аныкталды.

Хатлон облустук прокуратурасындагы өз булак шектүү өз күнөөсүн мойнуна алганын билдирди.

Бул арада кыздын апасы күйөөсүнө дооматы жок экенин айтып, аны жоопкерчиликтен бошотууну суроодо.

Укук коргоо органдарына арызды жабырлануучунун өз атасынын туугандары берген.

Тажикстан мыйзамдары боюнча 14 жашка чыга элек балдарга карата сексуалдык асылуу үчүн эки жылдан беш жылга чейин эркинен ажыратуу жазасы каралган.

Тажикстан Башкы прокуратурасынын маалыматына караганда, акыркы тогуз айда 189 жашы жете элек өспүрүм сексуалдык кылмыштардын курмандыгы болгон. Бул өткөн жылдын ушул мезгилине караганда 30 учурга көп.