Полиция Алматыдагы митинг катышуучуларын кармап жатат. 16-декабрь 2019-жыл

Казакстанда блогер Азамат Байкенов 16-декабрда «мыйзамсыз митинг өткөргөн» деген айып менен 10 суткага камакка алынды. Тиешелүү чечимди Петропавловск шаардык соту кабыл алды.

Социалдык түйүндөр аркылуу бийликти сындаган билдирүүлөрү менен таанымал блогер өзү бул айыптоолорду четке кагууда.

Күн мурун күч түзүм кызматкерлери Байкеновдун үйүндө тинтүү жүргүзүп, жубайына кол салуу болгону кабарланган. «Азаттыктын» казак кызматы менен телефон аркылуу байланышкан Мадина Байкенова анын колунан телефонун тартып алышканын билдирген. Анын айтымында, учурда ал жакындарынын коопсуздугу үчүн тынчсызданып, үйдөн чыкпай отурат.

Ал ортодо блогерге каршы кылмыш иши козголгону кабарланууда. Соттун басма сөз кызматынан учурда бул маалымат текшерилип жатканын билдиришти.

Казакстанда 2011-жылдагы Жаңы-Өзөн жана 1986-жылдагы декабрь окуяларынын курмандыктарын эскерүү иш-чарасынан кийин полиция ондогон активисттерди кармаган. Алардын айрымдарын акция башталганга чейин эле үйлөрүнөн алып кетишкен.

16-декабрдагы нааразылык иш-чаралары Казакстандын Эгемендүүлүк күнүнө туш келген.