Жалал-Абад шаарынын мэри Мураталы Тагаев бир ай аралыгында калаадагы аймактык башкармалыктардын жашоочулары менен жер-жерлерде жолугушууларды өткөрдү. Жыйынтыктоочу жолугушуу областтык Барпы атындагы драма театрында кеңири форматта орун алды.

Шаар башчысынын эл менен болгон жолугушууларынын максаты жашоочуларга калаа бюджетинин эсебинен 2019-жылы аткарылган жалпы жумуштар боюнча отчётун берүү жана алардын түйшөлткөн маселелери менен жеринде таанышуу болуп саналат.

Жолугушуулардын алкагында шаардын четки конуштарында таза суу, эскилиги жеткен электр мамыларын жаңылоо маселелери айтылып, көп кабаттуу үйлөрдүн айланасына балдар ойноочу аянттын жоктугу жана тазалык маселесин жакшыртуу сыяктуу көйгөйлөр айтылды.

Жалал-Абад шаарынын мэри Мураталы Тагаев 2020-жылы да тургундардын жашоо шартын жакшыртуу багытында калаада ири курулуштар орун алаарын билдирди. Аны менен бирге жолугушууларда айтылган маселелер унутта калбасын айтып, шаарды өнүктүрүүдө конкреттүү пландары бар тургандардын оюн угууга да даяр экенин кошумчалады.   

Эске салсак, калаа башчысынын жер-жерлерде эл менен болгон жолугушуулары бир ай аралыгында 19 ирет уюштурулду.