Кыргыз Республикасынын Президенти Сооронбай Жээнбеков 16-декабрда, Сауд Арабиясынын Королдугуна расмий визитинин алкагында Эр-Рияд шаарында Сауд Арабиясында жашаган мекендештер менен жолугушту.

Мамлекет башчысы мекендештерди Сауд Арабиясындагы  Кыргыз Республикасынын Элчилигинин имараттарынын жаңы комплексинин ачылышы менен куттуктады.

Чет өлкөдө жашаган кыргызстандыктар менен жолугушууга ар дайым кубанычта экенин белгиледи.

Ал расмий визиттин алкагында Сауд Арабиясы менен эң жогорку деңгээлдеги сүйлөшүүлөр ийгиликтүү өткөнүн, биргелешкен кызматташууну тереңдетүүгө багытталган бир катар эки тараптуу документтерге кол коюлганын баса белгиледи.

Президент Сооронбай Жээнбеков мекендештерге ийгиликтерди, максаттарына жетишин жана бекем ден соолук каалады.

Алардын топтогон тажрыйбалары жана билими өлкөнү өнүктүрүүгө салымын кошуу үчүн пайдалуу болооруна ишенимин билдирди.

Жолугушуу суроо-жооп форматында өттү.

Мекендештер өлкөнүн тышкы карызы, туризм, билим берүү, визалык процедураларды жөнөкөйлөштүрүү жана башка суроолорду беришти.

Аларды кызыктырган суроолорго Президент Сооронбай Жээнбеков жана Кыргызстандын расмий делегациясынын мүчөлөрү жооп беришти.