Human Rights Watch (HRW) эл аралык укук коргоо уюму Өзбекстанды Бириккен Улуттар Уюмунун (БУУ) сунуштарын аткарып, өлкө абактарындагы кыйноону жана ырайымсыз мамилени токтотууга чакырды.

Мындан тышкары уюмдун баяндамасында Ташкенттин эл аралык өнөктөштөрү өлкө жетекчилиги менен жолугушууларда бул маселени козгоп турушу керектиги белгиленген.

«Өзбекстан бул жаман көрүнүштү биротоло токтотуу үчүн кыйноого каршы аракеттерди тез арада баштоонун зарылдыгын түшүнүшү керек, — деп билдирди уюмдун Европа жана Борбор Азия боюнча аткаруучу директору Хью Уильямсон.

Өткөн жумада БУУнун комитети Өзбекстан боюнча документинде 2017-2018-жылдары кыйноо тууралуу арызданып, прокуратурага кайрылгандар 10 эсе көбөйгөнүн кабарлаган. Комитет ырайымсыз мамиле үчүн жоопко тартылган кызмат адамдарынын саны ошол эле бойдон калганына тынчсыздануусун билдирген.

Комитет кыйноодон улам абакта көз жумган адамдар тууралуу кабардар экенин белгилеп, бирок андай учурлардын санын келтирген эмес.