Былтыр май айында Өзбекстандын президенти Шавкат Мирзиёев өлкөнүн мурдагы башкы прокурору Рашид Кадыровду «чыныгы ууру» деп атап, жакында ал улуттук телеканалдан кечирим сурай турганын билдирген. Бирок мурдагы аткаминердин сөзү жазылган тасма даяр болгондон бери үч ай өтсө да көрсөтүлө элек.

Өлкөнүн Башкы прокуратурасын 15 жыл башкарган Рашид Кадыров 2018-жылы февралда кармалып, быйыл июнда 10 жылга эркинен ажыратылган. Ал «Пара алуу», «Салык төлөөдөн качуу», «Алдамчылык», «Кылмыш иштери боюнча тергөө иштерине кийлигишүү» жана «Кылмыштуу жол менен табылган кирешелерди адалдоо» беренелери боюнча күнөөлүү деп табылган.

Кадыровдон тышкары прокуратура жана Улуттук коопсуздук органдарында иштеген дагы 12 аткаминер түрдүү мөөнөттөргө соттолгон.

Мурдагы башкы прокурордун кылмыштары тууралуу тартылган тасманы көрүп чыккан өз булактын айтымында, 70 мүнөттүк тасманын аягында Кадыров жана аны менен чогуу соттолгон аткаминерлер кылган кылмыштарына өкүнүп, президенттен жана элден кечирим сурашкан. Тасманы даярдоо иштери былтыр күзүндө башталып, быйыл жайында аяктаган.

Аты-жөнүн билдиргиси келбеген өзбек аткаминеринин айтымында, тасманы Улуттук коопсуздук кызматынын мурдагы төрагасы, Олий Мажлистин (парламент) сенатору Рустам Иноятовдун кийлигишүүсүнөн кийин көрсөтпөй туруу чечими кабыл алынган.