Бишкекте бир катар саясий партия, жаштар уюмдарынын өкүлдөрү, жарандык активисттер Мамлекеттик каттоо кызматынын алдында нааразылык акциясын өткөрүштү. Алар паспорттон "улут" деген графаны алып салуу демилгесине каршы пикирин билдиришти.

Жарандык активист Адиль Турдукуловдун "Азаттыкка" айтуусунда, алгач алар Чыңгыз Айтматовдун эстелигинин жанында чогулуп, Мамкаттоонун кеңсесине чейин жөө жүрүш жасашты. Жалпысынан акцияга 60тай адам катышты.

Жарандын улуту көрсөтүлбөй турган паспорттун жаңы үлгүсү боюнча долбоорду Мамлекеттик каттоо кызматы сунуштаган. Мекеме жетекчиси Тайырбек Сарпашев паспорттогу “бешинчи графаны” алып салуу жарандык биримдикти бекемдөөгө багытталганын айткан эле.