Жалал-Абад шаардык мэриясынын аппарат жетекчиси Эрнист Зияйдиновдун  иш бөлмөсүнөн буюмдарын уурдап кетти деп шектелген жаран 2-октябрь күнү кармалып, тергөө кызматына өткөрүлүп берилди. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, үстүбүздөгү жылдын 28-август күнү Жалал-Абад шаарынын 1983-жылы туулган тургуну Э.Зияйдинов арыз менен кайрылган. Себеби, ошол эле күнү болжол менен саат 11:30 чамасында Жалал-Абад шаардык мэриясынын 3-кабатындагы жумуш бөлмөсүндөгү капчыгын, анын ичинде 100 (жүз) АКШ доллары, 5550 (беш миң беш жүз элүү) сом, 1 (бир) даана «Оптима банк» карточкасы жана ID жарандык паспортун белгисиз кылмышкерлер уурдап кетишкен.

Бул арыздын негизинде окуя болгон жерге кароо жүргүзүлүп, тиешелүү материалдар топтолуп, Жалал-Абад ШИИБнин КЖБРне “Уурдоо” фактысы менен катталып, КР КЖКнин 200-беренесинин 1-бөлүмүнүн негизинде сотко чейинки өндүрүш иши ачылган.

Берилген тергөө тапшырмасынын негизинде Жалал-Абад ШИИБнин КМКнын опер кызматкерлери ыкчам иликтөө иштеринин натыйжасында 2019-жылдын 2-октябрь күнү Жалал-Абад шаарынын 2003-жылы туулган Т.О. (аты-жөнү өзгөртүлдү) аттуу тургуну шектүү катары кармалып, тергөө кызматына өткөрүлүп берилген.

Кылмыш иши боюнча учурда тергөө амалдары жүргүзүлүүдө.

Эскерте кетсек, жакында эле мэрдин кабылдамасында шаардык бир мекеменин жетекчисинин 27 миң сомдук кол телефону жоголгон.