Туран аймактык кеңешинде Европа сапатындагы дистанциондук башкаруудагы суу өлчөөчү эсептегичтер орнотула баштады. Бул эсептегичтер жеке турак жайлар жайгашкан аймактарда коюлат. Туран аймактык кеңеши пилоттук деп тандалып алынган, эми бул аймакка 3360 дистанциондук башкаруудагы суу өлчөөчү эсептегичтер ортнотулмакчы. Бул тууралуу шаардык мэриянын басма сөз кызматы билдирди.

Алынган маалыматка караганда, «Борбордук Азия суу боюнча Альянсы» коомдук бирикмесинин аткаруучу директору Тынарбек Мусабаев бул долбоор сууну үнөмдүү пайдаланууга жардам берерин айтып, Борбордук Азияда биринчилерден болуп Кыргызстандын экинчи борбору болуп эсептелинген  Ош шаарыда ишке ашып жаткандыгын белгиледи.

- Бул суу өлчөгүчтөр Европанын Өнүктүрүү жана Рекструкциялоо Банкы жана Швейцария мамлекети тарабынан каржыланган «Ош шаарындагы таза суу жана саркынды суу системаларын реабилитациялоо» долбоорунун алкагында орнотулуп жатат. Ош шаарында биринчи жолу коюлуп жатат. Орнотулган соң, бул эсептегичтер «Ошшаарсууканал» муниципалдык ишканасына өткөрүлүп берилет,- деди Т.Мусабаев.

Учурда 200гө жакын жеке турак жайлар суу өлчөөчү эсептегич менен камсыз болду. Орнотуу мөөнөтү 2017-жылдын июнь айына чейин жүргүзүлөт. Долбоордун баасы 1 млн. 788 миң евро. Дистанциондук башкаруудагы суу өлчөөчү эсептегичтерди орнотуу иштерин  «Ошшаарсууканал» муниципалдык ишканасына кызматкерлери швецариялык адистер менен биргеликте ишке ашырууда.

Белгилей кетсек, суу эсептегичтин техпаспорту үй ээсинде сакталат. Ошондой эле кыш  мезгилинде жеке турак жай ээлери таза суу түтүкчөлүрүн жылылоосу зарыл, ал эми дистанциондук башкаруудагы суу өлчөөчү эсептегичтер «Ошшаарсууканал» муниципалдык ишканасынын жеке көзөмөлүндө болот.