Хатлон облусунда жол курулушчулар көмбөй кеткен чуңкурга түшүп мерт болгон үч баланын үй-бүлөсүнө бул ишти сүйлөшүү жолу менен чечүү сунушталууда.

“Азаттыктын” тажик кызматы билдиргендей, маркум балдардын ата-энесине эки бөлмөлүү үй сунушталууда. Бийлик бул боюнча азыркыга чейин түшүндүрмө бере элек.

13-сентябрда “Азаттыктын” тажик кызматы 10 жаштагы Нозанин, 7 жаштагы Махжабин жана 6 жашар Шахриёрдун өлүмү тууралуу кабарлаган. Балдардын сөөгү 16-июлда жол курулушчулары көмбөй таштап кеткен чуңкурдан табылган. Чуңкурдун ичине суу толуп, балдар чөгүп кеткен.

«Кангурт-Балжувон-Ховалинг» унаа жолу Азия Өнүктүрүү Банкынын каржылоосу менен кытайлык China Road компаниясы тарабынан салынган. Компания азырынча билдирүү тарата элек. Балдардын ата-энесинин күнөөлүүлөрдү жоопко тартуу талабы көңүл сыртында калган. Райондук прокуратура балдардын денесинен кыйноо белгилери табылбаганын билдирген.

Бирок бул маалыматты “Азаттыктын” тажик кызматы жарыялагандан кийин бийлик өкүлдөрү маркум балдардын ата-энесинен бул ишти сүйлөшүү жолу менен чечүүнү сурашкан. Балдардын атасы бир чечимге келе элек.

12-сентябрда Азия өнүктүрүү банкы “Азаттыктын” тажик кызматынын кайрылуусуна кат түрүндө жооп берип, бул иш боюнча Тажикстан Транспорт министрлигинен кошумча маалымат алып жатканын билдирген.

Узундугу 43 чакырым, туурасы 7 метрди түзгөн «Кангурт-Балжувон-Ховалинг» жолунун ачылыш аземи 6-августта президент Эмомали Рахмондун катышуусунда өткөн.