Идлиб провинциясы, август 2019-жыл

Быйыл май айында Сириянын Идлиб провинциясындагы хлор колдонуу менен жасалган чабуул үчүн президент Башар Асаддын режими жоопкерчиликтүү. Бул тууралуу Нью-Йорктогу маалымат жыйынында АКШнын мамлекеттик катчысы Майк Помпео билдиргенин Reuters агенттиги жазды.

Өз сөзүндө Помпео чабуул тууралуу маалыматтарды Кошмо Штаттардын Чалгын кызматы иликтеп чыкканын белгиледи.

Сирия бийлиги аларда химиялык курал жок экенин айтып, өлкөдөгү ыктымал химиялык чабуулдарга тиешеси жок экенин билдирип келет.

Майдагы ыктымал чабуулдан көп өтпөй Вашингтон Москва менен Дамаскты Сириянын жарандык объектилерине ылгабастан чабуулдарды жасоого айыптаган.

Маалымат жыйында Помпео Сириянын өкмөтүнө күйүүчү май жеткирген орусиялык эки компанияга каршы санкция киргизилгенин билдирди. Орусиянын Тышкы иштер министрлиги Вашингтондун бул чечимин «саясий акылсыздык» деп атады. Мекеменин маалыматына караганда, санкция салынган компаниялар күйүүчү майды Сириядагы орус армиясына жеткирген.

АКШ башында турган эл аралык коалиция Сириядагы радикалдык маанайдагы исламчыларга каршы күрөштү 2014-жылы баштаган. Коалиция Сириянын демократиялык оппозициясынын күчтөрүн колдойт. Орусиянын Сириядагы аскердик өнөктүгү 2015-жылы 30-сентябрда башталган. Андан бери коалиция Москваны Сириянын президенти Башар Асаддын режимин колдоп жатат деп бир нече жолу айыптаган. Батыш өлкөлөрү Сириянын бийлиги тарабынан адам укуктары жапырт түрдө бузулуп жатканын билдирип келишет.