Жалал-Абад шаарында быйылкы “Тарых жана маданият” жылына карата Барпы сейил көчөсүндөгү скверди реконструкциялоо, аны шаардыктардын эс алуучу эң бир жагымдуу жайына айландыруу максатында курулуш иштери жүрүп жатат. Муну  шаардык коммуналдык чарба жана көрктөндүрүү департаментинен билдиришти.

Алынган маалыматка караганда, шаар мэриясы Барпы скверин толугу менен реконструкциялап, шаардыктардын бош убактыларында мыкты эс алуусуна жагымдуу шарт түзүүнү чечкен. Буга жергиликтүү бюджеттен 4 миллион 100 миң сом акча каралган.

Азыркы тапта курулуш иштери баштоо үчүн аракеттер жүрүүдө. Башкача айтканда, Барпы Алыкуловдун эстелигин жаңылоо, атма сууларды орнотуу, анын айланасын жана жалпы эле скверди жашылдандыруу иштерин жүргүзүү үчүн тендер жарыяланды.

- Бул ишти биз жылдын аягына чейин бүткөрөбүз. Шаардыктар үчүн абдан сонун шарттар түзүлүп калат, - дейт шаардык коммуналдык чарба жана көрктөндүрүү департаментинин жетекчиси Акылбек Нуркулов.