Жалал-Абадды жарык шаарга айландыруу долбоору ишке ашырылып жатат.  Шаар көчөлөрүн түнкүсүн жарыктандыруу максатында чырактар орнотулууда. Аны Жалал-Абад шаардык коммуналдык чарба жана көрктөндүрүү департаментинин эмгек жамааты ишке ашырмакчы. Бул тууралуу шаардык мэриянын басма сөз кызматы билдирди.

Аталган ишкананын жетекчиси Акылбек Нуркуловдун айтымында, түнкү жарыктандырууга жергиликтүү бюджеттен 270 миң сом бөлүнгөн. Азырга чейин 130 даана түнкү жарыктандыруучу чырактар  сатылып алынды.  Учурда түнкү жарыктандыруучу чырактар Б.Осмонов, Кыргыз Республикасы, Пушкин көчөлөрүнө орнотулуп бүттү. Шаардын дагы башка көчөлөрүнө кезеги менен түнкү жарыктандыруучу чырактар коюлат.

- Манас көчөсүнүн Шопоков, Кыргыз Республикасы көчөсү менен кесилишкен жерине чейин каналдын бойлорундагы тротуарларга түнкү жарыктандыруучу 40 даана чырак, 25 даана отургуч, 25 даана таштанды таштоочу урналар сатылып алынган. Жакынкы күндөрдө орнотулат. Буга жергиликтүү бюджеттен 280 миң сом бөлүнгөн, - дейт ал.

Эгер ушул долбоор толугу менен ишке ашса, Жалал-Абад шаары түнкүсүн жарык, жагымдуу болуп калары шексиз экенин мэриянын жетекчилери да тастыкташты.