Жалал-Абад шаарындагы “Спутник” кичи районуна кире беришинен орун алган  айланпаны реконструкциялоо иши башталуу алдында турат. Бул долбоор аталган кичи районду толугу менен көрктөндүрүү, инфраструктурасын жакшыртуу долбоорунун алкагында ишке ашырылат. Бул тууралуу шаардык коммуналдык чарба жана көрктөндүрүү департаментинин башчысы Акылбек Нуркулов билдирди.  

Анын айтымында, айланпаны реконструкциялоо быйылкы жылдын иш-планына киргизилген жана ага жергиликтүү бюджеттен 1 миллион 872 миң сом бөлүнгөн. Учурда бул долбоорду ишке ашыруучу ишкананы тандап алуу максатында тендер жарыяланды. Жыл аягына чейин айланпа толугу менен оңдоп-түзөөдөн өтөт.

- Андан сырткары, “Спутник” кичи районундагы Жеңижок көчөсүнүн №36 көп кабаттуу үйүнүн алдына балдар ойноочу үлгүлүү аянтча курулмакчы. Буга жергиликтүү бюджеттен 251 миң сом бөлүнгөн. Кийинки аптада аны ишке ашыруучу ишкананы тандап алуу үчүн тендер жарыяланат жана жыл аягына чейин толугу менен бүткөрүлөт, -дейт А. Нуркулов.