Жалал-Абад шаарынын өнөрпоздору “Тарых жана маданият” жылына карата Жалал-Абад облусунда уюштурулган “Керемет жерим – Кыргызстан” аттуу кароо-сынакка катышып, өз өнөрлөрүн элге тартуулашты. Бул тууралуу шаардык мэриянын басма сөз кызматы билдирди.

Алынган маалыматка караганда, бул иш-чарада шаардык маданият бөлүмү башында турган жалалабаддык өнөрпоздор шаардын жана кыргыз элинин тарыхына, каада-салттарына, келечектүү умтулуштарына байланышкан ар кандай сахналаштырылган оюн-зоокторду, шоу-программаларды, ыр-бийлерди даярдашып, “Жалал-Абад” санаторийинин аймагында шаардыктарга жана санаторийде эс алып жаткандарга кеңири тартуулашты.

Көрүүчүлөргө улуттук каада-салтка байланышкан “Чач өрүү”, “Ак кийди” сыяктуу сахналаштырылган иш-чаралар, бий топтору бийлеген улуттук бийлер, унутта калып бараткан кыргыздын эски ырлары, улуттук саркеч кийимдердин үлгүлөрүн даңазалоо боюнча номерлер өзгөчө кызыгууну жаратты.

- Биздин маданият кызматкерлерибиз бул кароо-сынакка жакшы даярдыктар менен келишти. Андан сырткары, кароо-сынакта шаардагы мекеме-ишканалар, окуу жайлары даярдаган көргөзмөлөр, андагы коюлган улуттук буюмдар да келген көрүүчүлөрдүн көңүлүн бурду. Эң башкысы, шаардык тийиштүү кызматтар кароо-сынактын жакшы өтүшүнө карата жакшы шарттарды жаратып беришти, - дейт шаардын вице-мэри Турдалы Темирбаев.

Эми кароо-сынактын облус боюнча жыйынтыгын калыстар тобу чыгарып, алдыңкыларды белгилешет.