Жалал-Абад шаардык кеңешинин депутаттары өткөн жумада өткөн сессиянын жыйынында “Мутакалим” коомдук фондусунун кайрылуусун карап, анын шаарда иш алып барышына макулдук беришти. Бул тууралуу шаардык мэриянын басма сөз кызматы билдирди.

Алынган маалыматка караганда, “Мутакалим” коомдук фондусунун Жалал-Абаддагы филиалы бардык тийиштүү документтери жана шарттары менен юстиция органдарынан каттоодон өткөн жана анын филиалын түзүп иштетүүгө 254 киши демилгечи болгон. Эми шаар аймагында өз ишин жүргүзүү үчүн алар жергиликтүү өз алдынча башкаруу органдарынын макулдугун алышы керек. Бул тууралуу сессиянын жыйынында депутат Майрамбек Адылбеков айтып чыкты.

Бирок, айрым депутаттар коомдук фонддун филиалын ачуу боюнча демилгечи топто шаардын эмес, башка аймактардын өкүлдөрү бардыгын эске алышып, бул маселени шашпай карап, кийинки жыйындарда чечим кабыл алууну сунушташты. Ошондой эле, депутаттар “Мутакалим” коомдук фондусу тууралуу маалыматтарынын жетишпестигин да жашырышпады.

Бир топ талаш-тартыштардан кийин бул маселе колго салынып, депутаттардын көпчүлүгү аталган фонддун филиалынын шаарда иш жүргүзүүсүнө макулдук беришти.

Эске сала кетсек, “Мутакалим” коомдук фондусу 1999-жылы түзүлүп, Кыргызстандын бардык аймактарында аялдардын арасында адеп-ахлак, дин тутуу жагынан иш жүргүзүп келет.