Орусиянын Москва облусунда Тажикстандан барган кумса өз мекендештери тарабынан сабалды. Бул тууралуу «Азаттык» радиосунун тажик кызматы Москвадагы «Стимул» аттуу ЛГБТ тобуна шилтеме кылып билдирди.

Уюмдун юристи Антон Рыжовдун айтымында, 27 жаштагы Али аттуу жаранды ур-токмокко алды деген шек менен бир адам кармалып, дагы үчөөнө издөө жарыяланды.

Өзүн жыныстык азчылык топтордун өкүлү деп эсептеген Али соңку алты жылдан бери Орусияда кафелерде жана соода борборлорунда иштеп келген. Ал 22-августта «Стимулга» кайрылып, мекендештери андан акча талап кылып, «туура эмес жолго түштүң» деп сабап, мунун баарын видеого тартып алышканын айтып берген.

ЛГБТ өкүлдөрү менен 2015-жылдан бери иштеп келаткан «Стимул» уюмунун маалыматына ылайык, бул аларга тажикстандык жаран кайрылган биринчи учур болду. Буга чейин Өзбекстандын, Кыргызстандын жана Түндүк Кавказдын өкүлдөрүнөн арыз-даттануулар түшкөн.