Жалал-Абад шаарында 2019-жылдын 21-август күнү саат 00:33тө Бакиев жана Айтматов көчөлөрүнүн кесилишинде жайгашкан борбордук базардан өрт чыккан.

Өрттүн кесепетинен болжол менен жалпы аянты 2500 чарчы метр түзгөн соода түйүндөрү жана күндөлүк турмуш тиричиликке керектелүүчү товарлар күйүп кеткен. Жабыркагандар жок.

Өрттү өчүрүүгө Жалал-Абад шаардык №20 АӨКБдан 3 бөлүм, №58 ӨКБдан 1 бөлүм, Сузак райондук №65 ӨКБдан 1 бөлүм жана №59 ӨКБдан 1 бөлүм, ӨКМ облустук башкармалыктын ыкчам тобу, жалпы 6 бөлүм тартылган. Мындан сырткары РЭТ мекемесинен 1 бригада, тез жардам кызматынан 2 бригада, газ чарба кызматынан 1 бригада, Экотехинспекциядан 4 кызматкер, ИИМден 170 кызматкер, ЖКККБдан 2 экипаж тартылган.

Тартылган күчтөрдүн жардамы менен өрт саат 01:50дө чектөөгө алынып, саат 04:15те толук өчүрүлгөн. Өрттүн келип чыгуу себеби жана келтирилген материалдык чыгымдар такталууда.

Жалал-Абад шаардык мэриясынын билдирүүсүнө ылайык, учурда өрттүн келип чыгуу себебин атайын эксперттик комиссия иликтеп жатат. Ал эми жергиликтүү бийлик тарабынан түзүлгөн комиссия жабыркаган соодагерлердин тизмесин түзүп, мыйзам чегинде жардам берүү жолдорун карашууда. Базар кайра калыбына келтирилгенче убактылуу сатуучу жай ачып берүү жагы да эске алынган.