Ташкент шаарынын акимине жолугушуу үчүн келген Мирабад районунун ондон ашуун тургуну аткаминер тарабынан орой мамилеге туш болушту.

Район тургундары 2017-жылы мурдагы аким Рахмонбек Усманов балдар аянтчасы менен автоунаа токтотууга арналган жерди мыйзамсыз түрдө жеке ишкерге берип койгонун айтышып, аны кайра кайтарып берүүнү суранышкан.

"Азаттыктын" өзбек кызматы жарыялаган аудиожазууда алар эгер талап аткарылбаса, президентке кайрылып, балдары менен митингге чыга турганын айтышкан. Аким бул маселени чече албай туранын билдирип, сотко кайрылуу кеңешин берген. Бирок район тургундарын мындай жооп ынандырган эмес:

– Сиз бизди прокуратурага, прокуратура сотко, сот болсо кайра сизге жиберип жатат. Силер эмне элди шылдың кылып жатасыңарбы? Сизде мурдагы шаар башчысынын чечимин жокко чыгаруу укугу бар го, жокко чыгарыңыз, – деген алар.

Мындан соң Ташкент мэри Жахонгир Артыкходжаев аларды каарып, тилдеген:

– Мени сотко бергиле! Каалаган жагыңарга кайрылгыла! Кааласаңар, президенте баргыла, кааласаңар кудайга баргыла! Арызыңар менен Брюсселге баргыла! Эгер каласаңар пикет өткөргүлө.

Ташкент мэри менен жолугушкан жарандардын бири шаар башчысы менен бир пикирге келе алышпаганын, аткаминер администрациядан аларды кууп чыкканын белгиледи.

Ташкент мэри Жахонгир Артыкходжаев 100дөй ишканага ээлик кылары, өзбек экономикасынын эн кирешелүү тармактарын көзөмөлдөй турганы айтылып жүрөт.