Чаткалдагы «Кичи-Чаарат» байытуучу фабрикасын ишке киргизүү аземине өкмөт башчы Мухаммедкалый Абылгазиев катышты.

«Кичи-Чаарат» икашанасы 2008-жылы түзүлгөн, Чаткал районунун Каныш-Кыя айыл округунда жайгашкан. Куру-Тегерек жана Сулуу-Тегерек участокторунда чалгындоо иштери аяктагандан кийин алтын материалдарын чыгаруу башталган. Учурда фабрикада 529 адам иштейт, анын ичинде 419у жергиликтүү жашоочулар.

Премьер-министр Мухаммедкалый Абылгазиев ишкананын өндүрүштүк объекттерин көрүп чыгып, технологиялык процесс менен таанышты.

«Инвестор алтын кен ишканасынын курулушуна жана тиешелүү өндүрүштүк инфратүзүмдү түзүүгө 220 млн АКШ долларынан ашуун салууда. Ишкананы зарыл көлөмдөгү кубаттуулук менен камсыздаган өзүнүн электр чубалгылары тартылды. Мамлекет өз кезегинде мындай инвесторлорго ар тараптуу колдоо көрсөтүп келет. Бирок ошону менен бирге алардын алдында конкреттүү талаптарды коет, айрыкча курчап турган чөйрөнү коргоо жана социалдык милдеттемелерди аткаруу боюнча», – деп белгиледи Абылгазиев.

Фабрика кызматкерлери премьерден айлыкты көбөйтүүнү суранышты. Учурда эмгек акынын орточо өлчөмү 16-19 миң сомду түзөт. Өкмөт башчы инвестор алтын кен ишканасында өндүрүш башталган соң биринчи кезекте ушул маселени чечүүгө милдеттенгенин билдирди.