Душанбеде Кытайдын төрагасы Си Цзиньпин менен тажик президенти Эмомали Рахмондун сүйлөшүүлөрүнөн кийин кызматташтык тууралуу 18 документке кол коюлду. Алардын арасында инвестиция, айыл чарба, терроризмге каршы күрөшүү жана биргелешкен жаңы ишканаларды ачуу келишимдери бар.

Си Цзиньпин Душанбеге мамлекеттик сапары менен Азиядагы өз ара кызматташуу жана ишеним кеңешинин саммитинин алкагында барган.

15-июнда эки лидер Душанбенин борборуна 1,5 миллиард юанга бааланган өлкөнүн жаңы парламент имаратын куруу тууралуу долбоорго кол коюшту. Ошондой эле тараптар терроризмге, сепаратизмге, улуттар аралык кылмыштуу топторго, мыйзамсыз маңзат сатууга жана киберкылмыштуулукка каршы күрөшүү боюнча макулдашууларга кол койгону кабарланууда.

Мындан тышкары Рахмон менен Си Цзиньпин 2020-жылы өлкөлөр ортосундагы товар алмашуу көлөмүн 3 миллиард долларга жеткирүү тууралуу макулдашты.

Маалыматтарга караганда, былтыр эки өлкө ортосундагы соода-сатык көлөмү 1,5 миллиард доллардан ашкан.