Бириккен Улуттар Уюмунун (БУУ) Адам укуктары боюнча башкармалыгы Казакстандагы жапырт кармоого тынчсыздануусун билдирди. Уюм өлкө бийлигин адам укуктары тармагындагы милдеттемелерин аткарууга үндөдү.

«Казакстан бийлигинин 9-июнда өткөн президенттик шайлоо учурунда тынч демонстранттарга, активисттерге жана журналисттерге болгон мамилеси тынчсызданууну жаратат, – деп айтылат билдирүүдө. Бириккен Улуттар Уюмунун (БУУ) Адам укуктары башкармалыгынын Борбор Азия боюнча кеңсесинин башчысы Ришарда Коменда өз пикирин эркин билдирүү жана тынч жыйындарга чогулуу ийгиликтүү жана динамикалуу коомдун негизи экенин, буларды чектөө туруктуулукка доо кетирерин айтты.

Буга чейин Нур-Султан жана Алматы шаарларында мыйзамсыз митингдерге катышканы үчүн сот 957 адамды административдик жазага тарткан.

Алардын ичинен 670 адам 6 күндөн 15 күнгө чейин камакка алынган, 115 адам айып төлөгөн. 172 адамга эскертүү берилген.

Казакстанда уруксат берилбеген митингдер 9-июнда, мөөнөтүнөн мурда өткөн президенттик шайлоо күнү, андан кийинки эки күн бою өткөн. Бир эле күндө полиция 700гө жакын адамды камакка алган.

9-июнда өткөн кезексиз шайлоодо Касым-Жомарт Токаев 70 пайыздан ашык добуш алып жеңишке жеткен. Экинчи орунда оппозициялык саясатчы Амиржан Косанов, үчүнчү орунда Дания Еспаева турат.

Оппозициянын өкүлдөрү жана эркин байкоочулар шайлоодо мыйзам өтө көп бузулганын, Токаевдин пайдасына бюллетендер уучтап ташталганын билдирип жатышат.