Балдар – биздин келечегибиз, эртеңибиз. Балдарга карата камкордук бүгүнкүдөй майрамдарда гана, же маал-маалы менен эмес, күн сайын ырааттуу жүргүзүлүүгө тийиш. Бул багытта мамлекеттик бийлик, анын ичинде Жалал-Абад шаары да алардын туура таалим-тарбия алуусуна керектүү шарттарды түзүү  аракетин көрүүдө. 

Бул тууралуу шаар мэри Мураталы Тагаев  ден-соолугунун мүмкүнчүлүгү чектелген наристелерден жана ооруканаларда дарыланып жаткан балдардан кабар алуу учурунда билдирди.

Анда калаа жетекчиси шаардагы мүмкүнчүлүгү чектелген балдардын  психоневрологиялык  үйүндө болуп, майрам  ээлерин куттуктап, аларга  ден соолук  каалады. Аны менен катар алып барган акчалай жардам жана  белек-бечкектерин тапшырды. Мындай көңүл бөлүү  үй-бүлөө тибиндеги Ак-Бермет балдар үйүндө, кургак учукка каршы күрөшүү борборунун балдар бөлүмүндө улантылды. Калаанын вице-мэрлери М. Адылбеков, Б. Узакбаев  мындагы балдардын майрамдык шаңына ортоктош болушту.

Жалал-Абад шаарынын жергиликтүү бийлиги  балдарды коргоо күнүнө карата 18 жашка чейинки 460 ден соолугунан мүмкүнчүлүгү чектелүү, 36 тоголок,  жарым жетим, турмуш шарты оор жана 2010-жылдын июнь окуяларында ата-энелери жабыр тарткан  балдарга 500 сомдон акчалай жардам көрсөттү.

Иш-чара  Барпы драма театрынын алдындагы аянтчада сүрөт тартуу сынагы,  көңүл ачуучу концерттик программалар менен улантылды.

Эскерте кетсек,  бул жылы жергиликтүү бийлик  балдарды коргоо күнүнө карата жергиликтүү бюджеттен 283 миң сом акча каражатын бөлгөн.