Түркмөнстанда курулуш материалдары кымбаттады. “Азаттыктын” түркмөн кызматы кабарлагандай, цементтин наркы эки эсеге көтөрүлдү.

Суу ташкынынан жабыр таркан Мары облусунда 50 килограммдык бир кап цемент 50 манатка чейин кымбаттады. Дашогуз облусунда анын наркы 40-55 манат. Буга чейин цементтин баасы 15-18 манат болгон. Түркмөнстанда расмий курс боюнча 1 доллар 3,5 манатка барабар.

Курулуш материалдары өлкө аймактарын сел каптаган маалда кымбаттады. Марттын экинчи жарымынан бери нөшөрлөгөн жаан токтобой, калктуу конуштарды, талааларды сел каптап, автомобиль жана темир жолдор бузулду.

Өзгөчө өлкөнүн батыш жана түштүк-чыгыш бөлүгү жабыр тартты. Балкан облусунда Берекет шаарын суу каптап, Сердар, Түркмөнбашы, Балканабат калаалары селден жабыр тартты.

​Өлкө бийлиги сел коркунучу тууралуу алдын ала эскерткен эмес. Учурда Мары облусунда дамбалар курулуп, суу жээктери бекемделүүдө.

Түркмөнстан цемент өндүрүшүн көбөйтөрүн бир нече жолу жарыялаган. Өлкөдө жыл сайын 1 миллион тонна цемент чыгарууга кудуреттүү төрт ири завод бар.