АКШнын мамлекеттик катчысы Майк Помпео Венесуэланын президенти Николас Мадуро өз өлкөсүнөн чыгып кетүүгө даярдык көргөнүн, бирок Орусия аны бул оюнан кайтууга көндүргөнүн билдирди.

Помпео CNN телеканалына берген маегинде Николас Мадуронун учагы учуп кетүүгө даяр турганын, бирок Кремль аны токтотуп калганын маалымдады. Анын айтымында, учак Гаванага багыт алмак.

Помпео Вашингтон толугу менен оппозиция лидери Хуан Гуайдону колдоп жатканын тастыктады. Шейшемби күнү эртең менен Гуайдо өз тарапташтарын 1-майда Мадуронун бийлигин кулатуу үчүн көчөлөргө чыгууга үндөгөн. Эки тараптын кагылышуусу курчуп, 50дөн ашык киши ар кыл жаракаттар менен Каракастагы медициналык борборго жеткирилди.

"Убакыт келди! Биз Венесуэлада эркиндикке жана демократияга жетүүгө аракет жасайбыз", - деп жазды Гуайдо Твиттердеги баракчасына.

Өлкө бийлиги бардык социалдык түйүндөргө жана мессенжерлерге бөгөт коюуга үлгүрдү.

Венесуэла президенти Николас Мадуро оппозиция уюштурган каршылык акциялары мамлекеттик төңкөрүш аракетине тете экенин, бирок алардын иши ордунан чыкпай турганын жарыялады.

АКШнын мамлекеттик катчысы Майк Помпеонун “ал Венесуэладан чыгып кетүүнү пландаган” деген билдирүүсүн жөнсүз деп атады. Орусия ТИМи дагы Помпеонун билдирүүсүн четке какты.

Венесуэлада президенттик шайлоо былтыр майда өткөнүнө карабастан, Николас Мадуро бийликтеги экинчи мөөнөтүнө быйыл январда гана киришкен. Жарым жылдан ашуун убакыт оппозиция шайлоонун жыйынтыктары бурмаланганын белгилеп, бойкоттоп келген. Бул көчөлөрдө ири акциялардын башталышына түрткү болгон.